Мәктәпләрдә каникуллардан соң укучыларның белемнәрен тикшерәчәкләр

«Киләсе уку елы башында укучыларның белем дефицитын ачыклау һәм тиешле методик ярдәм күрсәтү өчен белемнәренә диагностика ясалачак. Бу эшкә билге куелмаячак. Без балаларның белем дәрәҗәсенең чын картинасын аңларга тиеш, аларның белемнәрендәге җитешсезлекләрне бетерү буенча барлык чараларны да күрергә кирәк», — диде Кравцов.

Министр сүзләренчә, 1 сентябрьдән Россиядә барлык мәктәпләр эшен гадәти режимда башлаячак.

«Без барлык мәктәпләрнең дә ачылуына әзерләнәбез, традицион линейкалар оештырылачак. Бердәм дәүләт имтиханын үткәрү вакытында тупланган тәҗрибә мәктәпләрдә укуларны оештырганда да кулланылачак. Роспотребнадзорның барлык таләпләре дә исәпкә алыначак», - дип аңлатты Кравцов.

Министр яңа уку елында мәктәп укучыларын укыту традицион, классик көндезге формада узачак, диде. «Без дистанцион укытуны кертергә уйламыйбыз. Барлык дистанцион формаларның уңай яклары булса да, аларны өстәмә итеп кенә карыйбыз», - дип басым ясап әйтте Кравцов.

Министр шулай ук 1 сентябрьдән сыйныф җитәкчеләре 5 мең сум күләмендә өстәмә түләүләр алачак, дип искәртте. Моннан тыш, Россиядә яңа уку елыннан башлап башлангыч сыйныф укучыларын кайнар аш белән тәэмин итү буенча эксперимент башланачак. 

https://tatar-inform.tatar/news/science/27-07-2020/m-kt-pl-rd-kanikullardan-so-ukuchylarny-belemn-ren-tiksher-ch-kl-r-5759543