Тынычлыкны кызлар саклый

автор, 23 август 2012 - 10:39

966

"Таттелеком" предприятиесе объектларының хәвеф-хәтәрсез эшләве җәмгыять өчен бик зур роль уйный. Шуны истә тотып, моннан нәкъ ун ел элек республиканың көньяк-көнчыгыштагы элемтә объектларын саклау белән шөгыльләнүче "Легион" җәмгыяте барлыкка килә. Аның штатында бүген йөзгә якын хезмәткәр исәпләнә. Филиаллары Әлмәт, Чистай, Мөслим, Сарман, Ютазы, Зәй һәм башка бик күп шәһәрләрдә бар. Предприятиенең төп штабы Чистай шәһәрендә урнашкан. Аның генераль директоры - Валерий Бондарев. Һәрбер филиалда дүрттән алып тугыз кешегә кадәр эшли. Кайбер шәһәрдә бер генә филиал булса, кайберләрендә алар икешәр.

- Безнең төп эшчәнлек - "Таттелеком" телефон элемтәсен хәвеф-хәтәрдән саклау. Бу эш белән нәкъ ун ел шөгыльләнәбез инде. Лицензияне биш ел саен алыштырып торабыз. Эшебездә заманча җиһазлар кулланабыз, - ди директор, үз эшчәнлеге белән таныштырып.

Сак хезмәте булгач, анда ир-атлар эшләргә тиеш кебек тоела. Ә "Легион"да эшләүче сак хезмәткәрләре барысы да хатын-кызлар.

- Хатын-кызлар белән эшләү авыр түгелме? - дип сорыйм.

- Теләсә кем яхшы сакчы була ала, - дип фикер йөртә ул. - Безнең эш төгәллек һәм игътибарлык таләп итә. Ә хатын-кызлар ир-атларга караганда җаваплылыкны ныграк тоеп эшли. Ирләргә дә зарланмыйм, әмма күбесе спиртлы эчемлекләр куллана. Андыйларны сак эшенә алып булмый бит, - ди ул.

Хезмәткәрләрнең барысы да физик күнекмәләргә ия. Алар дәүләти булмаган учреждениеләрдә бер айлык курсларда укый, аннан соң ике айга кадәр стажировка үтә. Шуннан соң кулларына курслар узу турында таныклык бирелә.

Берәр объектта гадәттән тыш хәл чыгып, сак бүлегенә хәбәр килә икән, дежурда торучы хезмәткәр тиз арада әлеге урынга тоткарлау төркеме җибәрә. Тиешле җиргә килеп җитү 3 - 5 минут вакытны ала.

"Легион" сак предприятиесенең безнең шәһәрдәге филиалы Куйбышев урамы, 15 нче йортта урнашкан, анда дүрт кеше эшли. Тырыш, бердәм команда туплаган Валерий Миронович. Бригадир Роза Григорьева һәм сакчылар - Альбина Малыхина, Әлфия Бикмөхәммәтова һәм Ольга Савельева.

- Бу кызлар үз вазифаларын бик яхшы башкаралар, - ди директор алар турында. - Эшкә бирелеп, беренче көннәрдән үк үз сәләтләрен күрсәтте алар. Шуңа да, кыска вакыт эчендә ышаныч яулап алды. Сак эшен оештыруда барлык төр мәгълүматның оператив булуы мөһим роль уйный. Ә бу сакчылар белән өзеклекләр булганы юк, - ди ул.

Димәк, тынычлыкны кызлар намус белән саклый, дип әйтергә була алар турында.

Следите за самым важным и интересным в Telegram-каналеТатмедиа

Безнең Телеграм-каналга кушылыгыз: https://t.me/zamansulyshy

Оставляйте реакции

К сожалению, реакцию можно поставить не более одного раза :(
Мы работаем над улучшением нашего сервиса

Тынычлыкны кызлар саклый

Оставляйте реакции

Расскажите друзьям

Нет комментариев

Теги: таттелеком