Азрак белсәң, күбрәк түлисең

Заманасына күрә көе дигәндәй, беренче карашка гап-гади тоелган исәпләгеч­ләр дә даими үзгәреп тора. Ут яки су урларга теләүчеләргә каршы көрәштә әллә нинди яңалыклар уйлап табарга туры килә. Әле кайчан гына исәпләгечләргә магнитка каршы пломбалар урнаштыра башлаганнар иде. Бу юлы канун проекты ук әзерлә­гәннәр. “Интернетта файдаланган электр энергиясе, газ яки суны киметеп күрсәтергә ярдәм итүче, ягъни исәплә­гечләрне алдарга өйрәтүче мәгълүмат бик күп. Хәтта аерым сайтлар да бар. Гамәл­дәге канун ниге­зендә мондый сайтларны ябу өчен суд карары таләп ителә”, – дип аңлат­кан канун проектын уйлап табучылар. Роскомнадзор мәгълүмат­ларына караганда, 2013 елдан бирле законсыз рәвештә акчаны янда калдырырга өй­рәтүче сайтларга бәйле өч мең­гә якын суд карары үз кө­ченә кергән. Исәп-хисап ясаудан барыбер качып котылып булмаячак, ди коммуналь ху­җалык тармагы вәкилләре. Күпкатлы йортларда, мәсә­лән, түләнми калган чимал бәя­се фатир хуҗа­ларының барысына да бертигез бүленә, дигән­нәр.

Быелның беренче яртысында илдә яшәүчеләргә 1,37 триллион сумлык коммуналь түләүләр исәпләгәннәр. Узган елның шушы ук чоры белән чагыштырганда, бу – 5,7 процентка күбрәк. Соңгы дүрт елда түләүләрнең гомуми кү­ләме 40 процентка арткан. Шушы вакыт эчендә Татарстанда яшәүчеләр ут, газ һәм су өчен өчтән бергә күбрәк түли башлаган. Агымдагы елның беренче яртысында республика халкы 35,6 миллиард сумлык чимал тоткан. Шунысы да бар: ил күләмендә исәпләнгән 1,37 триллион сумлык түләүләр­нең 1,3 триллион сумы өчен генә исәп-хисап ясалган.

Фото:https://pixabay.com

https://www.vatantat.ru