Күрше шәһәрдә подъезд ишеген ачканда укучы кыз баланы ток суккан

Бу очрак буенча җинаять эше кузгатылган.

Бөгелмә шәһәрендә 8 яшьлек кыз бала әтисенә ияреп, әбисенә кунакка килгән. Әтисе домофон төймәсенә баскан, ә кыз подъезд ишеген ача башлаган. Домофон ишекне ачкан мизгелдә баланы ток суккан. Бу вакытта яңгыр ява торган булган. Шушы хәлдән соң укучы баланы хастаханәгә илткәннәр, дип хәбәр итә bugulma-tatarstan.ru.

Хәзерге вакытта бу факт буенча Россия Тикшерү комитетының ТР буенча Тикшерү идарәсе Бөгелмә тикшерү бүлегендә "Кулланучыларның тормышы яки сәламәтлеге куркынычсызлыгы таләпләренә җавап бирмәгән хезмәтләр күрсәтү" маддәсе буенча җинаять эше кузгатылган.