Рөстәм Миңнеханов: “Лениногорск - республикадагы иң матур шәһәрләрнең берсе”

Татарстан Лидеры Рөстәм Миңнеханов шәһәребезнең - 60, "Лениногорскнефть" идарәсенең 70 еллыгын бәйрәм итүдә катнашты.

Үткән җомга-шимбә көннәрендә Татарстан Лидеры Рөстәм Миңнеханов шәһәр һәм районда төзелгән һәм төзекләндерелгән объектларны ачты, тантаналы чарада катнашты. Әлеге мөһим вакыйгаларга әзерлек Рөстәм Миңнехановның контрольлегендә алып барылды. Чөнки шәһәребез һәм "Лениногорскнефть" идарәсе юбилейлары республика өчен аеруча мөһим әһәмияткә ия: нәкъ менә бездә - Шөгер нефть промыселындагы 1 нче скважинадан Татарстанның нефть ятмаларын эшкәртү башланган.

Беренче көнне Республика Лидеры элек Шөгер нефтебитум заводы булган җирдә музей ачты. Ул - шәһәрдәге нефть музееның филиалы буларак, районыбызның гына түгел, бөтен Татарстанның күренекле урыны булып торачак. Республикадагы тарихи объектларны саклау - Татарстан җитәкчелеге эшенең мөһим өлеше булып тора.