Таһир Шәмсуаров: Язлар кирәк җирдә кешегә

Кышкы кием төште җилкәләрдән,

Рәхәт икән юка күлмәктән.

Чыпчыклар да биеп ята әнә

Минем елмаюны күрмәктән!

Кабатланмас язгы көләч көндә

Урамга чык балкып ишектән.

Изүләрне ачар мизгел килде-

Бөре җырын тышта ишетәм.

Күз чагыла кояш нурларыннан,

Шуны гына әйтәм мин сезгә.

Нәкъ апрельдә күңел тансыклаган

Сөям дигән назлы бер сүзгә.

Кышкы карга язган хыялларны

Мин тормышка бүген ашырам.

Өметләрне кәгазь көймә итеп

Гөрләвекләр сезгә тапшырам.

Чәчәкле май карый инде күзгә,

Сизгер йөрәк ничек сизмәсен.

Сыерчыклар җырлап каршы ала,

Кушылмыйча ничек түзәсең?!

Гүзәллекне күрә белмәгәннең

Җылы көндә җаны күшегә.

Яшәү матурлыгын тояр өчен

Язлар кирәк җирдә кешегә!..

Таһир Шәмсуаров